කටකාර සිතුවිලි වල පෙලගැස්ම

Jun 1, 2017

සිතින් සිත බැඳ අතින් අත ගෙන සොඳුරු දෙහදක් යාවුනා

පාසලේ ඉඳන් සරසවිය දක්වාම ලබැඳියන් වගේ එක බත්පතට වගකියපු. ජීවිතයට සොඳුරු මතකයන් එක්කරපු. බ්ලොග් ලෝකයට එන්න පාර හදල දීපු කසුන් අයියටත් මගේ ආදරණීය යෙහෙලිය සත්‍යා නිර්මානිටත් අදින් ඇරඹුනු යුග දිවිය සාර්තක වාසනාවන්ත දිවි ඇති තුරාවටම දෙහදක් ආදරයෙන් පිරි සමණල වසන්තයක් වේවායි මම හදවතින්ම සුබපතනව.


තුරුවැල් මල් හසරැලි විසිරී
මුමුනයි ආදරයක අසිරී
සත්‍ය කසුන් හට සුබාසිරී
ගෙනඑයි මුදු පවනැලි සරැලී


දහසක් බාදක විඳ දිරියෙන්
ආ මග නැවතුනි සිනා තොටින්
ආදරයේ රන් කිරුලු දරන්
අද දෙහදක් සැනහේ සතුටින්


දිවිමග ඉසුරෙන් සපිරෙන්නයි
සැමදෙවියන් ඔබ රැකදෙන්නයි
දූදරුවන් ලැබ සෙනෙහෙ කැදැල්ලක
සහසක් පැතුමන් ඉටුවෙන්නයි

May 21, 2017

තටු සිඳුනු සමනළී

තටු සිඳුනු සමනලී
නෙත් කඳුලු සැලි සැලී
අවසන්ව සැනකෙලී
ලතවේවි සියුමැලී


ගම්මානයේ සොඳුරු රූ තාරකාවී
නෙත්මානයේ මව් හැදුනු සීදේවී
සිනා කැන් සල සලා දඟ කරපු සාවී
දිරියෙන්ම නැණ වඩපු සොඳ බාලිකාවී


කැකුලු ඇඟ කඳ සොඳට
මෝරලා යස රුවට
රොන් සොයන බිඟු කැලට
බැලුම් අඩු නෑ නුඹට


රිය කවුලුවෙන් ගමේ දිලිඳුකම් බල බලා
ගම වටේ ඉගිලුනේ ඔහු සමග හිනහිලා
ඔහු කතාවෙන් මැවූ සුරලොවේ තනිවෙලා
නුඹ හඬයි  ඉකිලමින් ගම අසල නැවතිලා


Mar 13, 2017

ඉතින් ඉගිලී යන්න



ඇවිත් නුඹෙ නෑසියන්
දායාධ විමසමින්
වචන අවි අමෝරා යුධ වදිනවා
දෑවැද්ද නැති ගෑනු ගන්න තොට පිස්සුදැයි
රුදුරු කරකෂ වදන් ඇසෙනවා
සතෙන් සතේඑක්කරන්
මාසෙ මුල පඩි පතෙන්
කනකරට රන් රුවන්
නොතැනුවේ කිම මගෙන් අහනවා
අම්ම ගේ බෙහෙත් ටික
ලිප ඉදෙන බත්පතට
මගේ හැම හීනයම
කැප කරපු බව නුඹත් දන්නවා
සැප දුකට හුරු හිතක්  
ආදරෙන් නුඹ නමින්
දායාධ ලෙස දෙන්න
මගේ ලඟ නොවෙනස්ව තියනවා
නුඹට ඒ දායාධ පිලිගන්න නොහැකි නම්
ඉතින් ඉගිලී යන්න
හදවතේ දොර කෞලු හරිනවා

Jan 23, 2017

අනේ මෙහෙමත් අම්මලා.

දීර්ග විරාමයකට පස්සෙ ඔන්න කටකාරිටත් හිතුන ලියන්න. හිතුන නෙවෙයි හිත පහුරු ගගා ලියපං ලියපං කියල කටකාරිට වද දෙන්න පටන් ගත්ත. මොකද ඒ තරම්ම මගේ හිත ගැස්සුනු මට සංවේදී වුනු සිදුවීමක් මට හමු වුනා. මෙතන ඉඳන් මම ඔයාලට කියන්න හදන්නෙ ඒ කතාව. දෙමව්පියො කිව්වහම ඒ අය ගැන ළමයි වෙච්ච අපිට කියන්න අටුවා ටීකා ඕන නැහැනෙ. ඉතින් හැම ගැහැණු ළමයෙක්ම කවදහරි පෙරුම්පුරන්නෙ හොඳ අම්ම කෙනෙක් වෙන්න. ඒකනෙ පුංචි කාලෙ ඉඳන් බෝනික්කො නලවන්නෙ. කිසිම හැඟීමක් දැනීමක් නැති බෝනික්කන්ට කවල පොවල බලාගන්නෙ. ඉතින් මමත් එක්ක සෙල්ලම් බත් උයපු මගේ මිතුරියක් කුලුඳුලේ අම්ම කෙනෙක් වෙලා. කටකාරිත් ගියා හරිම ආසාවෙන් පුංචි පැටියව බලන්න. චූටිම චූටි බෝනික්කියෙක් වගේ දූ පැටියෙක් මගේ මිතුරියට ලැබිල. ඒත් එයා මට කියපු කතාවකට මට අනේ අපොයි කියල හිතුන. මගේ මිතුරිය ගෙ සැමිය රැකියාව කරන්නෙ විදෙස් ගත වෙලා. ඉතින් ඇයට දරුව ලැබෙන කාලෙට ඔහුට නිවාඩු ගන්න බැරි නිසා 2017 ජනවාරි 25 මෙලොව එලිය දකින්න හිටපු කිරිකැටියට මාස දෙකක් කලින් ඉපදෙන්න සිද්ද වෙලා. ඒ කියන්නෙ 2016 ඔක්තෝම්බර් 25 සීසේරියන් සැත්කමක් මගින් පෞද්ගලික රෝහලකදි සිය කිරිකැටිය මෙලොවට බිහි කරන්න ඔවුන් තීරණය කරල. ඉතින් යාලුවනේ අඩුමාසෙන් අඩු බර ඇතිව ඉපදෙන ළමයින්ට ඇති වෙන අවදානම් ගැන මම අමුතුවෙන් විස්තර කරන්න අවශ්‍ය නෑ කියල හිතනව. නම මසක්ම කුසේ දරා ගෙන නීරෝගීව නියමිත කාලෙට දරුව බිහි කරන්න තමයි හැම අම්ම කෙනෙක් ගේම ප්‍රාර්තනය. ඒත් දැන් දැන් දරුවාට නියමිත් කාලෙට මෙලොව එලිය දකින්න තියන අයිතියත් අපේ දෙමව්පියන් මෙලෙස උදුරා ගන්නේ කෙලෙසදැයි මට හිතාගැනීමට තරම්ම අපහසු කරුණකි. මව ගේ හෝ දරුවා ගේ සෞක්ඛ්‍යට බලපාන ගැටළු තත්වයකදී නම් මෙය ඉතා සාදාරණ බව කිව හැකිය.එහෙත් මෙවන් පෞද්ගලික අරමුණක් උදෙසා හෝ තමා ගේ පහසුව තකා හෝ මව්වරුන් ගන්නා මෙවන් තීරණ වලින් අසරණ වන්නේ එලෙස මෙලොවට එලිය දකින බිලින්දන්ය. ඔවුන්ට දිවි ගෙවන්නට වී ඇත්තේ තම ජීවිත කාලය පුරාම නොයෙක් ලෙඩ රෝග වලට ගොදුරු වෙමින් හෝ යම් යම් ආබාධිත තත්ව වලට ගොදුරු වෙමින්ය අද වන විට මෙය ඉතාමත් කේදවාචකයක් වී ඇත.සල්ලි විසි කරන්නට හැකි අය මෙලෙස තමන්ට ඕන දිනයට තමන්ට අවශ්‍ය දවසට වේලාවට දරුවන් මෙලොවට බිහි කරගනියි. නමුත් නිදහසේ මෙලොව එලිය දැකීම දරුවා ගේ අයිතිය බව නොසිතයි. මෙය මගේ සිත වැඩියෙන්ම කම්පා කරන්නට විය මන්දයත් මමත් යම් කිසි සෞක්ක්‍ය හේතුවක් නිසාවෙන් අඩුමාසයෙන් මෙලොව එලිය දැකදෘශ්‍යාබාධිත තත්වයෙන් ජීවිතය පුරාම දිවි ගෙවන නිසාවෙනි. මෙහි ආදීනව විඳවන තරම මම හොඳ හැටි අත්විඳ ඇත.ඉතින් මම එදා මගේ මිතුරිය ගෙ නිවසින් පිට වූයේ ඒ සිගිත්තියට කිසිඳු අතුරු ආන්ත්‍රාවකට මුහුන දීමට සිදු නොවේවායැයි සිතින් පතමිනි.

Jan 1, 2017

නව වසරට කටකාරි ගෙන් සුබපැතුම්

මගේ බ්ලොග් එකට ගොඩවැදුණු මගේ නිර්මාන වලට හොඳ නරක පහදාදෙමින් කොමෙන්ට් දාල මාව දිරිමත් කරපු සියළුදෙනාටම ලැබුවාවූ 2017 නව වසර නිදුක් නීරෝගී සුබ සිහින ඉටුවෙන අබියෝග වලට සාර්ථකව මුහුනදී ජය ලැබෙන සුන්දර වසරක් වේවා. කියල කටකාරි හදවතින්ම සුබපතනව. මේ වසරෙත් මාත් එක්කම මගේ නිර්මාන එක්කම රැඳෙන්න ඔබ සැමට ආරාධනා කරනව.